අවපැහැ වූ සමට ආයුර්වේද වෛද්‍ය සත්කාර

සමේ ගැටලු නොසලකා ඉන්න එපා

නූතන මානවයා හෙවත් හෝමෝ සේපියන් නමැති සත්ත්ව විශේෂයට කෝටි 650ක තරම් මනුෂ්‍ය සංඛ්‍යාවක් අයත් වෙනවා. විවිධ රටවල ජීවත් වන ඔවුන් තමන්ගේ සම, කෙස්, ඇස්වල පැහැය, නාසය, තොල්, මුහුණ, හිසේ හැඩය, සිරුරේ ප්‍රමාණය අනුව එකිනෙකාට වෙනස් වෙනවා. මිනිසුන්ගේ බාහිර ලක්ෂණ අනුව ඔවුන් ප්‍රධාන වශයෙන් කොකෙසොයිඩ්, නීගේ‍රායිඩ්, මොන්ගොලොයිඩ්, ඔස්ට්‍රොලොයිඩ් ආදී ලෙස වර්ග කර තිබෙනවා. දකුණු ආසියාතිකයන් වන අප ප්‍රධාන වශයෙන් කොකෙසොයිඩ් කාණ්ඩය යටතට වර්ග වෙනවා. නමුත් අද වන විට මෙම වර්ග කිරීම අනුව හඳුනාගත නොහැකි වන තරමට එම වර්ග එකිනෙකා හා සමඟ මිශ්‍රවීම් සිදුවෙමින් තිබෙනවා.


සමාන පරිසරයක ජීවත් වන සමාන වයස් දෙදෙනකුගේ පවා සමේ ස්වාභාවය වෙනස් වන්නේ ඔවුන්ගේ මවුපියන්ගෙන් ලැබෙන්නා වූ ප්‍රවේණිගත ජාන අනුව සමෙහි කෘෂ්ණ රංගානු (මෙලනින්) ප්‍රමාණය තීරණය වීම මතයි. මෙලනින් වර්ණකය ද්‍රව තත්ත්වය යටතේ පවතින විට සම පැහැපත් ස්වාභාවයක් ගන්නා අතර එය කැටිති තත්ත්වයේ පවතින විටදී සමෙහි පැහැපත් බව අඩුවී යනවා. මීට අමතරව පාරිසරික, දේශගුණික සාධකද සමෙහි වර්ණය කෙරෙහි තාවකාලික බලපෑමක් සිදු කරනවා. පිටරටක දිගු කලක් ගතකර පැමිණි විටදී සම වෙනස් පැහැ ගෙන තිබෙනු දක්නට ලැබෙන්නේ ඒ නිසයි. නමුත් නැවැත මාස කිහිපයක් ගතවෙද්දී තමා ජීවත්වන පරිසරයට අනුකූලව තමාට උරුම සමෙහි පැහැය ලැබෙනවා. එම සත්‍ය වටහාගත යුතුයි.


තමාට උපතින් උරුම වී ඇති සමෙහි පෙනුම කෘත්‍රිමව වෙනස් කර ගැනීමට යෑම බොහෝ අතුරු ආබාධ හා රෝගයන් වෙත බලෙන් අතපෙවීමක්. කල් ගතවන විටදී එහි ප්‍රතිඵල ඉතාමත් දරුණු විය හැකියි. ලෝක ප්‍රකට ගායක මයිකල් ජැක්සන් උදාරණයකට ගන්න. උපතින් කළු ජාතිකයකු වූ ඔහු නොයෙකුත් සැත්කම්, ආලේපන හා ඔෟෂධ වර්ග මඟින් සුදු සමක් ලබා ගත්තා. නොකඩවා එන්නත් ලබා ගත්තා. වයස අවුරුදු 50දී පුහුණුවීම් අතරතුරේදී මිය යන විට ඔහු බොහෝ චර්මගත ආසාත්මිකතා වෙනුවෙන් ප්‍රතිකාර ලබාගනිමින් සිටියා.

සිනමාවේදී, වේදිකාවේදී, ඡායාරූපකරණයේදී හෝ වෙනත් වෘත්තීමය කටයුත්තකදී උචිත වූ වෙනස් පෙනුමක් ලබාගන්න අවශ්‍ය වනවා විය හැකියි. එහි ගැටලුවක් නැහැ. විවාහය කියන්නේ ඔබේ ජීවිතයේ වෘත්තීමය කටයුත්තක් නොවෙයි. ඉතා ආදරණීය ජීවිත මතක සැමරුමක්. ජීවිතයේ සංධිස්ථානයක්. මාල හතක් බැඳ මාමාගේ අත අල්ලන් පෝරුවට නැග රන් තැලි කර පලන්දාගෙන, උරුමක්කාරයාගේ දෑඟිලි බැඳ අෂ්ටක ගැයුම් අවසානයේ පුන් කලස් පසුකර පෝරුවෙන් බැස කැත්තෙන් පොල් ගෙඩිය දෙපළු කර මවුපියන් දෙපා නැමැඳ කඳුළු පිරි නෙතින් හා නෑ හිත මිතුරන්ගේ කෙලි කවට කතා මැද රතු වූ මුහුණින් මංගල ගමන් යන්නට රජ මැදුරේ හා දුගී පැල්පතේ හැම තරුණියකම සිහින දකිනවා. ඉතින් ඒ අසිරිමත් සිහින දිනයේදී පෝරුව "එදා පෝරුවේදී දැක්කට වඩා මනමාලි සෑහෙන්න වෙනස්නෙ. අඳුරගන්නත් බෑ" ඔබට කවුරුන් හෝ මෙසේ කියා ඇති. නැත්නම් ඔබ කවුරුන් හට හෝ මෙසේ කියා ඇති.


මංගල දිනයේදී පෝරුවෙන් බැස යන ඔබ එකතු වන්නේ ඔබගේම ලබැඳි නෑදෑ හිත මිතුරන් පිරිස අතරටයි. ඔබ සැමදා ඔවුන්ට දුවක, සොහොයුරියක, හිතවතියක විය යුතුයි. සැමදා ඔවුන්ට සත්‍යවාදී අලුත් සාමාජිකාවක විය යුතුයි. පෝරුව මතදී ඔබේ සුන්දරත්වය ඔවුන් දකිනවා. එම සුන්දරත්වයෙන් යුතුවම පසු දිනයකදීද ඔබ ඔවුන් හමුවිය යුතුයි. වැදගත් වන්නේ එයයි. පෝරුව මතදී ඔබ ඔබටම හඳුනාගත නොහැකි ලෙසට ක්‍රීම් තට්ටු, තට්ටු තවරා වෙස් මුහුණක් පැලැඳ සිටියා නම් එලෙස කරන්නේ කෙසේද? සියල්ල හොඳින් කල්පනා කර බලන්න. මංගල පෝරුව මතදී, මංගල දිනයදා ඔබ ඔබ ලෙසම සැරැසී හිඳින්න. ඔබ ඔබම වෙන්න. පැය කිහිපයකට හෝ ඔබගේ අනන්‍යතාව, ඔබගේ උපන් මුහුණ සඟවා යන්න එපා.


මිනිස් ශරීරයක මුහුණේ, දෑත් සහ දෙපාවල සමෙහි තදබල ලෙස පෙනෙන වෙනසක් දක්නට නැහැ. මුහුණේ සමෙහි පැහැය මුළු ශරීරයේ සමෙහි පැහැය හා සමාන වෙනවා. නමුත් කෙනකුගේ මුහුණේ පැහැය ශරීරයේ සාමාන්‍ය සමෙහි පැහැයෙන් වෙනස්වී ඇත්නම් ඒ නිසැක වශයෙන්ම සමෙහි පැහැය කෘත්‍රිම ලෙස වෙනස් කර ගැනීමක්. ස්වාභාවිකව සමෙහි තිබෙන මෙලනින් ප්‍රමාණය කෘත්‍රිමව ආලේපන, එන්නත් හා සැත්කම් මඟින් වෙනස්කර ගැනීමක්. තාවකාලිකව එය පැහැපත් වීමක් බව පෙනෙනවා විය හැකියි. නමුත් වෛද්‍ය විද්‍යාව අනුව එය නිරෝගී පැහැපත් සමක් නම් නොවෙයි. නුදුරු අනාගතයේදීම සමෙහි ආසාත්මිකතාවන්වලට හා චර්ම රෝගයන්ට අතවැනීමක්. චර්මගත පිළිකා කැඳවා ගැනීමක්. සමහර විට ජීවිතයෙන් පවා වන්දි ගෙවීමක් විය හැකියි.


ලංකාවේ මධ්‍යම පාන්තික බොහෝ තරුණියන් තමන් උපයන මාසික වැටුපෙන් සියයට හැටකට වැඩි ප්‍රමාණයක් තමන්ගේ රූපලාවණ්‍ය කටයුතු සඳහා නිරපරාදේ වියදම් කරනවා. මෙය අද තරුණ පරම්පරාව පමණක් නොවයි සමාජයේ සෑහෙන පිරිසක් වෙළාගත් මහා අපරාධයක්. හැඩවෙන්න ඕනා. තරුණ කාලෙදි අඟර දඟර පාන්න ඕනා. ඇත්ත තමයි. ඒත් ඒ හැම දෙයක්ම ඔබගේ සමෙහි නිරෝගීතාව මත සිදුකළ යුතුයි. අනවශ්‍ය රෝම ඉවත් කරද්දී සම තුවාල වෙනවා. රෝම මුල කළු වෙනවා. පස්සේ කාලෙකදී කළු ලප සෑදෙනවා. ඉතින් වැඩක් තියෙනවාද? මුහුණට ෆේෂල් කළ පසුව සම පැළෙනවා, බිබිලි හටගන්නවා, සමේ පැහැය පිලිස්සී යනවා. පස්සෙ කාලෙක සමෙහි නොයෙක් අතුරු ආබාධ හටගන්නවා. ප්‍රයෝජනයක් තියෙනවාද? මෙලෙසට වියදම් කරනා මුදල් තමන්ගේ අනාගත අභිවෘද්ධියට ඉතිරි කරගන්න.


රූපලාවණ්‍ය ශිල්පියකුට සමට බාහිරව ආලේපන තැවරිය හැකි වුවත් සම ඇතුළු මුළු ශරීරයෙහි ක්‍රියාකාරිත්වය පිළිබඳ වගකීම වෛද්‍යවරයා සතු කාර්යයක්. නිරෝගි නොවන, කිසියම් චර්ම ආබාධයක් ඇති අයකුගේ සමට ආලේපන තැවැරීමට රූපලාවණ්‍ය ශිල්පියකුට සිදුකළ නොහැකියි. ඔබගේ සමෙහි කිසියම් සුළු හෝ වෙනසක් ඇතිවී නම් වහාම සුදුසුකම් ලත් වෛද්‍යවරයකුටම පෙන්වන්න.


පතිකුලයට යෑමට කාල වකවානු නියම කරගත් තරුණියන් වසරක පමණ කාලයක් තිස්සේ වරින් වර රූපලාවණ්‍යාගාරවල රස්තියාදු වෙනවා. ඔවුන් යා යුතු තැන වරද්දාගෙන. ඔවුන් යායුතු වන්නේ සම පිළිබඳ ප්‍රතිකාර කරනා ආයුර්වේද වෛද්‍යවරයකු වෙතටයි. ආයුර්වේද රූපලාවණ්‍ය ප්‍රතිකාරයේදී කසාය, ආලේපන, ස්ටීම් ප්‍රතිකාර ඇතුළු පංචකර්ම ප්‍රතිකාර ක්‍රම මඟින් ශරීරය අභ්‍යන්තරයේ සිට පෝෂණය කර නිරෝගී පැහැපත් සමක් ඔබට ලබාගත හැකියි. ඔබගේ සම නිරෝගීව, පිරිසුදුව, පැහැපත් කරගන්න. එවිට ඔබ තමයි ලස්සන. ඔබ තමයි පැහැපත්. ඔබ තමයි හැඩකාර. ඔබට එසේ සිතේවි. එවිට වෙස් මුහුණක් දමා ගැනීමකින් තොරව ඉතාමත්ම සුළු හා සරල ආලේපන ප්‍රමාණයකින් මනාලියක වන දිනයේදී ඔබට හැඩ විය හැකියි. එතකොට හොඳම ලස්සනම මනාලිය ඔබයි.

Wmqgd .ekSu ��ir weiqfrks